საქართველოს პრემიერ-მინისტრ გიორგი კვირიკაშვილის facebook პოსტს, რომელშიც ის მთავარი პროკურორის შერჩევის პროცესზე არასამთავრობო ორგანიზაციების მიერ გაკეთებულ განცხადებას ეხმაურება, ასობით ადამიანმა “ჰაჰა” რეაქციით უპასუხა. ამის პარალელურად კი პოსტზე მოწონებებმა სწრაფი ტემპით იმატა, მეტწილად უცხო ქვეყნებში დარეგისტრირებული facebook მომხმარებლების, სავარაუდოდ ე.წ. ბოტების ხარჯზე.

აღნიშნულ პოსტში პრემიერ-მინისტრი წერს, რომ არასამთავრობო ორგანიზაციების მხრიდან იუსტიციის მინისტრ თეა წულუკიანის გადაყენების მოთხოვნა, „არის სრულიად აბსურდული და გონივრულ საფუძველს მოკლებული“.

„ჩვენ არაერთხელ ვთქვით და კიდევ ერთხელ სრული პასუხისმგებლობით ვაცხადებ, რომ მთავარი პროკურორის შერჩევის პროცესში მაქსიმალურად ფართო საზოგადოებრივ ჩართულობას უზრუნველვყოფთ. ეს ნიშნავს იმას, რომ ამ პროცესში საზოგადოების, აკადემიური წრეების, არასამთავრობო სექტორის წარმომადგენლები მიიღებენ მონაწილეობას. იუსტიციის სამინისტრომ კანონის შესაბამისად პროცედურები უკვე დაიწყო.

მიუღებელია, რომ არასამთავრობოების ნაწილი, ულტიმატუმის ენით გვესაუბრება და ცდილობს, ბოიკოტის გამოცხადებით ეჭვქვეშ დააყენოს პროცესის ლეგიტიმაცია. მათ განცხადებებში იკვეთება საკითხის პოლიტიკურ ჭრილში გადატანის მცდელობა, რაც ასევე სრულიად მიუღებელია. ამიტომ მოვუწოდებ მათ, ნუ გასცდებიან საკუთარი საქმიანობის მანდატს და თუ მათი მიზანი, მართლაც, პროცესის გამჭვირვალედ წარმართვაა, მეტი პასუხისმგებლობით მიუდგნენ თავიანთ გადაწყვეტილებებს“,- ნათქვამია პრემიერის განცხადებაში.

დღეს, ათამდე არასამთავრობო ორგანიზაციმ იუსტიციის მინისტრის, თეა წულუკიანის გადადგომა მოითხოვა. 

კვირიკაშვილი NGO-ებს ეხმაურება: თეა წულუკიანის გადაყენების მოთხოვნა აბსურდულია

არასამთავრობო ორგანიზაციები თეა წულუკიანის გადადგომას მოითხოვენ

„წულუკიანს მაგიდასთან არ დავუსხდებით" - NGO-ები პროკურორის შერჩევაში მონაწილეობაზე უარს ამბობენ

ომბუდსმენი: NGO-ების გარეშე მთავარი პროკურორის შერჩევის პროცესს სანდოობა არ ექნება