საქართველოს სახალხო დამცველმა, ნინო ლომჯარიამ რეგიონული პოლიტიკისა და თვითმმართველობის კომიტეტის სხდომაზე სიტყვით გამოსვლისას განაცხადა, რომ ომბუდსმენი ზუგდიდის მე-6 საჯარო სკოლის ყოფილი დირექტორის ია კერზაიას საქმეს დეტალურად სწავლობს. მისივე განმარტებით არჩევნების მიმდინარეობის პროცესში დაფიქსირებული დარღვევები აისახება ომბუდსმენის 2018 წლის ანგარიშში, რომელიც პარლამენტს მარტში წარედგინება.
„ია კერზაიას საქმეს ჩვენ ვსწავლობთ ძალიან დეტალურად, რამდენიმე მიმართულებით. ერთ-ერთი მიმართულება არის,- იყო თუ არა დისკრიმინაციული მიდგომა ამ ქალბატონის მისამართით; საქმის შესწავლა რამდენად იყო სამართლებრივად სწორი და გამართული ის გადაწყვეტილება, რაც მიიღეს; შემოწმების დაწყებასთან და შემდეგ უკვე შემოწმების დროს ხომ არ იყო დარღვეული კანონი; ასევე ვსწავლობთ იმას, ხომ არ არის სისხლის სამართლის დანაშაულის ნიშნები, რომ შემდგომ მივმართოთ საგამოძიებო ორგანოებს გამოძიების დაწყების მოთხოვნით.
სამივე მიმართულებით ძალიან აქტიურად ვმუშაობთ , ინფორმაცია გვაქვს გამოთხოვილი არაერთი უწყებიდან. განათლების სამინისტროდან კიდევ დამატებით ველოდებით გარკვეულ ინფორმაციას, მას შემდეგ, რაც გვექნება სრული სურათი, ჩამოვაყალიბებთ რეკომენდაციებს“, - განაცხადა ლომჯარიამ.
ზუგდიდის #6 საჯარო სკოლის დირექტორი ია კერზაია 9 დეკემბერს გარდაიცვალა. კერზაიას შვილი, ბაჩანა შენგელია დედის ჯანმრთელობის მდგომარეობის გაუარესებას მის მიმართ პოლიტიკურ ზეწოლას უკავშირებდა. ბაჩანა შენგელია, სკოლაში აუდიტის სამსახური შესვლას პედაგოგზე პოლიტიკური შეხედულების გამო ზეწოლად აფასებდა.
