საქართველოს პარლამენტმა პლენარულ სხდომაზე პირველი მოსმენით სავალდებულო გენდერულ კვოტირებასთან დაკავშირებულ კანონპროექტს მხარი არ დაუჭირა. მას მხოლოდ 66-მა დეპუტატმა დაუჭირა მხარი. „საარჩევნო კოდექსში", როგორც ორგანულ კანონში ცვლილების შეტანას 75 დეპუტატის მხარდაჭერა სჭირდებოდა. ყველა მათგანი, ვინც ცვლილებას მხარი დაუჭირა, ორი დეპუტატის გარდა, საპარლამენტო უმრავლესობის წევრია. გენდერული კვოტირების მხარდამჭერთა შორის იყვნენ „ნაციონალური მოძრაობის" წევრები რომან გოცირიძე და სალომე სამადაშვილი.
„ევროპულმა საქართველომ" გენდერულ კვოტირებას მხარი არ დაუჭირა. აღსანიშნავია, რომ „ევროპული საქართველოს" საპარლამენტო ფრაქციებში სულ 20 დეპუტატი არის გაწევრიანებული.
კენჭისყრის შედეგები - ვინ დაუჭირა მხარი და ვინ წავიდა გენდერული კვოტირების წინააღმდეგ
37 455 ამომრჩევლის მიერ წარდგენილი საკანონმდებლო ინიციატივა საპარლამენტო და ადგილობრივი თვითმმართველობის არჩევნებზე პარტიებსა და ბლოკებს ავალდებულებდა, რომ პროპორციულ სიებში ყოველი მეორე განსხვავებული სქესის კანდიდატი წარედგინა.
კანონპროექტის მიზანი იყო, პოლიტიკური პარტიებისათვის სავალდებულო გენდერული კვოტირების დროებითი ნორმის შეტანის გზით, წარმომადგენლობით ორგანოებში გენდერული ბალანსის გაუმჯობესება.
საკანონმდებლო ცვლილებების თანახმად, საპარლამენტო და ადგილობრივი თვითმმართველობის არჩევნებში პარტიული სიების წარდგენისას, პარტიებს ევალებათ, დაიცვან სქესთა ბალანსი ისე, რომ პარტიულ სიაში ყოველი მეორე განსხვავებული სქესის კანდიდატი წარადგინონ. წინააღმდეგ შემთხვევაში, ცენტრალური საარჩევნო კომისია პარტიას უბრუნებს სიას ხარვეზის აღმოსაფხვრელად, ხოლო ხარვეზის აღმოუფხვრელობის შემთხვევაში, პარტია რეგისტრაციას ვერ გაივლის. გარდა ამისა, როგორც პარლამენტის, ასევე საკრებულოს წევრის მიერ მანდატზე უარის თქმის შემთხვევაში, მის ადგილს იკავებს იმავე სიაში რიგით მომდევნო იმავე სქესის კანდიდატი.
ცვლილება მხოლოდ პროპორციულ სისტემას შეეხება. სავალდებულო გენდერული კვოტირების შემოღებით, პარტიულ სიებში (პროპორციული სიით) ყოველი მეორე წევრი ქალი უნდა იყოს. საბოლოოდ კი, პარლამენტში ქალთა 25%-იან წარმომადგენლობას - 150 დეპუტატიდან 38 ქალს მივიღებთ.
პარლამენტში ქალების რაოდენობით საქართველო მსოფლიოს 193 ქვეყანას შორის 120-ე ადგილზეა.
გლობალური გენდერის ინდექსის მიხედვით, პოლიტიკურ, ეკონომიკურ და სოციალურ ცხოვრებაში ქალთა ჩართულობით საქართველო, 144 ქვეყანას შორის, 90-ე ადგილზეა.
ამჟამად საქართველოს პარლამენტის წევრთა 16%-ია ქალი. 2016 წლის არჩევნების შედეგად საპარლამენტო მანდატი 24‐მა ქალმა მიიღო.
2014 წლის თვითმმართველობის არჩევნების შედეგების მიხედვით, მხოლოდ 11,6%-ია ქალი. ქვეყანაში 15 მინისტრიდან მხოლოდ ორია ქალი.
რომელი პარტიები უჭერენ მხარს სავალდებულო გენდერულ კვოტირებას
ქალები ჰალსტუხებით - პარლამენტში გენდერული კვოტირების შესახებ კანონპროექტს განიხილავენ
38 ქალი პარლამენტში - ნაბიჯი პირველი
სავალდებულო გენდერული კვოტირების შესახებ პარლამენტში კანონპროექტი შევიდა
არჩევნები სავალდებულო გენდერული კვოტირების გარეშე
ISFED: პოლიტიკაში ქალთა ჩართულობის გაზრდისთვის სავალდებულო გენდერული კვოტა უნდა დაწესდეს
ნაბიჯი გენდერული თანასწორობისკენ
მერობის ქალი კანდიდატი მარნეულიდან - „ჩვენ ეს უნდა გავაკეთოთ“
