თბილისის მერმა, კახა კალაძემ, დღეს მერიის მთავრობის სხდომაზე მეტროსადგურების რეაბილიტაციაზე ისაუბრა. მისი თქმით, მეტროს ვაგონების რეაბილიტაცია უკვე დაწყებულია და თებერვალში 4 ახალი რეაბილიტირებული შემადგენლობა დაემატება, რაც შეამცირებს მოცდის დროს და გაზრდის გადაყვანილი მგზავრების რაოდენობას.
„გარდა ამისა, პრიორიტეტად რჩება მეტროსადგურების რეაბილიტაცია. ვარკეთილის მეტროსადგურის (რომელიც ჩამოინგრა და სერიოზული პრობლემა იყო, დაზარალებულებიც გვყავდა) საპროექტო დოკუმენტაცია გადაეგზავნა ექსპერტიზის ეროვნულ ბიუროს და შეფასებებიდან გამომდინარე, საჭირო გახდა დამატებითი კვლევები და საპროექტო სამუშაოები.
ბევრჯერ მისაუბრია, რომ საზოგადოებრივი ინფრასტრუქტურის რეაბილიტაციისა და მშენებლობის დროს უპირველესი და უმთავრესია უსაფრთხოება, აქედან გამომდინარე, ის პროექტები, რომლებიც უკვე შესრულდა - ვარკეთილის მეტროსადგურის ჭერის სამუშაოები, შემიძლია უკვე დადასტურებით გითხრათ, რომ არაფრად არ ვარგა და საპროექტო სამუშაოები თავიდან არის ჩასატარებელი. ვფიქრობ, რომ წლის ბოლოს ჩვენ გვექნება სრული დოკუმენტაცია და მომავალი წლიდან დავიწყებთ მის განხორციელებას, ანალოგიურია ვითარება გურამიშვილის მეტროსადგურის პროექტთან დაკავშირებით“, - განაცხადა მან.
მისივე თქმით, სამგორის მეტროს სარეაბილოტაციო სამუშაოების პირველი ეტაპი დეკემბრის ბოლოსთვის დასრულდება, ხოლო 2019 წლის იანვრის ბოლომდე დასრულდება მეტროსადგურ ავლაბრის რეაბილიტაცია. კალაძე ამბობს, რომ მერია აპირებს 8 მეტროსადგურზე პროექტის შეძენას და მომავალი წლიდან ეტაპობრივად დაიწყება მათი სარეაბილიტაციო სამუშაოები.
*******
მეტროსადგურ „ვარკეთილში“ ჭერი 2018 წლის 30 იანვარს ჩამოიშალა, რის შედეგადაც 14 ადამიანი დაშავდა. მეტროსადგურში დასრულებული სარეაბილიტაციო სამუშაოები 2017 წლის სექტემბერში მაშინდელმა მერმა, დავით ნარმანიამ ჩაიბარა.
