ფრაქცია „ქართული ოცნება - ძლიერი საქართველოსთვის“ წევრი, ლევან გოგიჩაიშვილი იუსტიციის საბჭოს წევრებს მოუწოდებს, თავი შეიკავონ მოსამართლე ლევან მურუსიძის უვადოდ გამწესებისგან, რადგან მისი თქმით, „საზოგადოების დიდ ნაწილს არ სურს ასეთი ადამიანების ხილვა უვადო მოსამართლეებად“.
„უვადოდ დანიშნული მოსამართლე ეს არის ადამიანი, რომელსაც პირველ რიგში უნდა ჰქონდეს გავლილი საზოგადოებრივი ტესტი, უნდა ჰქონდეს გავლილი საკანონმდებლო ფილტრი და კრიტერიუმი, რომელსაც ეს ადამიანი უნდა აკმაყოფილებდეს. მთავარი კრიტერიუმი უნდა იყოს მორალური კრიტერიუმი და პროფესიონალიზმი.
მე არ ვფიქრობ, რომ მორალურ კრიტერიუმს აკმაყოფილებდნენ მურუსიძე და ის ადამიანები, რომლებიც იყვნენ ადეიშვილის მოსამართლეები, რომ გახდნენ უვადოდ მოსამართლეები.
ამიტომ პროცესი, რომელიც გუშინ პარლამენტში იურიდიულ კომიტეტში გაჩერდა, თავის თავში გულისხმობს იმ პროცესსაც, რომ პირველ და მეორე ინსტანციებში აღნიშნულ საკითხზე მსჯელობისას ადამიანებმა თავი უნდა შეიკავონ მანამ, სანამ არ იქნება გაწერილი კრიტერიუმი, რა კრიტერიუმითაც უნდა მოხდეს უვადო მოსამართლეების არჩევა“, - ამბობს გოგიჩაიშვილი.
მას შემდეგ, რაც პარლამენტმა იუსტიციის უმაღლესი საბჭოს მიერ წარდგენილი უზენაესი სასამართლოს მოსამართლეობის კანდიდატურების განხილვა გადადო, საბჭოს გადაწყვეტილებით, დღეს სააპელაციო სასამართლოს მოსამართლე ლევან მურუსიძესთან და 7 სხვა მოსამართლესთან უვადოდ დანიშვნის მიზნით გასაუბრება ჩატარდება.
