რუსეთის საგარეო საქმეთა სამინისტროს ცნობით, ხვალიდან საქართველოს მოქალაქეებისთვის რევიზო რეჟიმის გამარტივება იწყება.

„რუსეთ-საქართველოს ურთიერთობების ნორმალიზაციის პროცესიდან გამომდინარე, ორ ქვეყანას შორის პოზიტიური ურთიერთობების სტიმულირების მიზნით, 2015 წლის 23 დეკემბრიდან საქართველოს მოქალაქეებისთვის ბიზნეს, სამუშაო, საგანმანათლებლო და ჰუმანიტარული ვიზა მრავალჯერადი გამოყენებით გაიცემა. ასევე გაიცემა კერძო ვიზები, განურჩევლად მომწვევსა და მოწვეულს შორის ნათესაური კავშირისა", - ნათქვამია რუსეთის საგარეო საქმეთა სამინისტროს განცხადებაში. 

სამინისტროს ინფორმაციით, რუსული მხარე მოწადინებულია, გაამარტივოს ორი ქვეყნის მოქალაქეთა შორის ურთიერთობის გზები, რაც შემდგომში, შეთანხმების საფუძველზე უვიზო რეჟიმის შემოღებას არ გამორიცხავს. 

17 დეკემბერს რუსეთის პრეზიდენტმა, ვლადიმერ პუტინმა განაცხადა, რომ რუსეთი მზადაა, საქართველოსთან სავიზო რეჟიმი შეწყვიტოს.

პუტინმა, რომელმაც პრესკონფერენციაზე „მაესტროს" შეკითხვებს უპასუხა, აღნიშნა, რომ საქართველოსთან ურთიერთობების გაფუჭების ინიციატორი რუსეთი არ ყოფილა. მისი თქმით, საქართველოს ტერიტორიული მთლიანობის საკითხი ქართველი, ოსი და აფხაზი ხალხის გადასწყვეტია.

„მათთან მუშაობაა საჭირო. ნებისმიერ გადაწყვეტილებას მივიღებთ. დღეს კი მიუხედავად ყველა სირთულისა, რომელიც თქვენ ახსენეთ, ჩვენ ვხედავთ საქართველოს მოქმედი ხელისუფლებისგან გზავნილებს და ვიღებთ ამ გზავნილებს. ყურადღება მიაქციეთ, რომ საქართველოს ღვინის პროდუქტის 2/3 რუსეთში მოდის. ზრდის მზარდი ტემპია", - თქვა პუტინმა.

სავიზო რეჟიმის გამარტივების შესახებ რუსეთის განცხადებას წინ უძღოდა ევროკომისიის ანგარიში , რომელიც 18 დეკემბერს გამოაქვეყნდა, რომელშიც ნათქვამია, რომ საქართველო აკმაყოფილებს ყველა ნიშნულს, რომელიც ვიზალიბერალიზაციის სამოქმედო გეგმის მეორე ნაწილში იყო მოცემული.

იმისათვის, რომ საქართველომ უვიზო მიმოსვლა მიიღოს, ამ ანგარიშის შემდეგ ევროკავშირის საბჭოს მხრიდან პოლიტიკური გადაწყვეტილების მიღებაა საჭირო. პროცედურულად, ევროკომისია მინისტრთა საბჭოსა და ევროპის პარლამენტს  რეკომენდაციით მიმართავს, საქართველოსთვის ვიზალიბერალიზაციის მინიჭების საკითხს კენჭი უყაროს. ევროპარლამენტი გადაწყვეტილებას ხმათა უმრავლესობით იღებს და მინისტრთა საბჭოს უგზავნის კენჭისყრისთვის. 

ძალაში შესვლის შემდეგ ვიზალიბერალიზაცია ბიომეტრული პასპორტის მქონე საქართველოს მოქალაქეებს შენგენის ზონაში, ოთხ კანდიდატ ქვეყანასა (ბულგარეთში, კვიპროსში, რუმინეთში, ხორვატიაში) და ოთხ არაწევრ ქვეყანაში (ისლანდია, ლიხტენშტეინი, ნორვეგია და შვეიცარია) 180-დღიან ვადაში, 90 დღით უვიზო მიმოსვლის საშუალებას მისცემს.

მოლდავეთის შემთხვევაში ევროკომისიის დადებითი დასკვნის გამოქვეყნების შემდეგ პროცედურების გავლასა და ვიზალიბერალიზაციის ამოქმედებას 6 თვე დასჭირდა.