მუნიციპალური ტრანსპორტის პრობლემა ადგილობრივი თვითმმართველობის არჩევნების წინ თბილისში ერთ-ერთ ყველაზე აქტუალურ საკითხად განიხილება. კანდიდატთა ნაწილი პრობლემის გადაჭრას დაწერილი პროგრამის გარეშე გეგმავს, არიან ისეთებიც, ვინც მცხეთა-თბილისი-რუსთავის დამაკავშირებელი მეტროს პროექტის დაწყებას გვპირდება. ტრამვაის ხაზის მშენებლობასთან ერთად კანდიდატების პროგრამებში ხშირად ნახავთ საბაგირო ქსელის მოწყობის დაპირებებს. „ლიბერალი" საზოგადოებრივი ტრანსპორტის შესახებ დედაქალაქის მერობის 9 კანდიდატის ხედვებს გთავაზობთ:
ელენე ხოშტარია - „ევროპული საქართველო"
- ავტობუსების პარკის განახლება და გაზრდა 800 ავტობუსამდე;
- ტრამვაის ხაზის გაკეთება და ქსელის განვითარების დაგეგმვა;
- საბაგიროების განვითარება: 6 ახალი ხაზის მშენებლობა;
- მეტროს არსებული ინფრასტრუქტურის კაპიტალური შეკეთება-განახლება, ახალი ხაზების დაპროექტება;
- შემოვლითი რკინიგზის პროექტის დასრულება;
- მარჯვენა და მარცხენა სანაპიროების დამაკავშირებელი საავტომობილო ხიდის მშენებლობა სამტრედიის ქუჩასთან;
- 10 ახალი ინფრასტრუქტურული პროექტის განხორციელება გზებზე.
კახა კუკავა - „დემოკრატიული მოძრაობა - თავისუფალი საქართელო"
- ავტომანქანების კატალიზატორით აღჭურვა. დამონტაჟების ხარჯებს დაფარავს თვითმმართველობის ბიუჯეტი;
- 2018 წლიდან სახელმწიფო შესყიდვა მხოლოდ ელექტრომობილებზე გამოცხადდება;
- 2 წლის განმავლობაში მიკროავტობუსების მთლიანად ჩანაცვლდება ავტობუსებით;
- საზოგადოებრივი ტრანსპორტისთვის სპეციალური დერეფნების მოწყობა;
- ხელშეკრულების გაუქმება „სითი პარკთან“.
ზაალ უდუმაშვილი - „ერთიანი ნაციონალური მოძრაობა"
- 7 ახალი ესაკადა, 3 ხიდი, 2 გვირაბი და ახალი მაგისტრალი;
- ქალაქის ერთიანი სატრანსპორტო გეგმის შემუშავება;
- ხელშეკრულების გაუქმება „სითი პარკთან“;
- შემოვლითი რკინიგზის შეჩერებული პროექტის დასრულება;
- მუნიციპალური ავტოპარკის ჩანაცვლება ეკოლოგიურად სუფთა, კომფორტული ავტობუსებით;
- მეტროს სადგურების გარემონტება და მოქმედი შემადგენლობის განახლება;
- არსებული მიწისქვეშა გადასასვლელების მოწესრიგება და ახლების აშენება;
- შშმ პირებისთვის ადაპტირებული გარემოს შექმნა.
ირმა ინაშვილი - „საქართველოს პატრიოტთა ალიანსი"
(როგორც „ლიბერალს“ „პატრიოტთა ალიანსმა“ განუცხადა, ირმა ინაშვილს საარჩევნო პროგრამა წერილობითი სახით არ აქვს, მისი ხედვები კი სრულად იყო წარმოდგენილი ტელეკომპანია „იმედის“ მიერ მოწყობილ დებატებში).
- უნდა შეიქმნას საცობების პრობლემის გადაწყვეტისთვის სპეციალისტების მიერ მომზადებული კონცეფცია;
- შენობების პირველი სართულების ხარჯზე, თაღოვანი ტროტუარების გაკეთება და გზების გაფართოება;
- მუნიციპალური ტრანსპორტისთვის ცალკე ზოლების მოწყობა;
- მიწისქვეშა და მიწისზედა ავტოსადგომების მოწყობა;
- ახალი მშენებლობებისთვის საპარკინგე ადგილების მოწყობის მოთხოვნა;
- ელექტრო და ჰიბრიდულ, თხევად და ბუნებრივ გაზზე მომუშავე ავტომობილებზე გადასვლის დაწყება.
გიორგი გუგავა - „საქართველოს ლეიბორისტული პარტია"
(გიორგი გუგავას საარჩევნო პროგრამა წერილობითი სახით არ წარმოუდგენია. აქ წარმოდგენილ ხედვებზე გუგავამ „ლიბერალთან" ინტერვიუში ისაუბრა).
- უნდა დაიწყოს რეგიონებში სოციალურ-ეკონომიკური მდგომარეობის გაუმჯობესება, რომ განიტვირთოს თბილისი;
- პარკირებისა და სატრანსპორტო პოლიტიკის სწორი დაგეგმარება;
- ხელშეკრულების გაუქმება „სითი პარკთან“ და პარკირების სისტემის გადაცემა მუნიციპალიტეტისთვის;
- ახალი მშენებლობებისთვის პარკინგისთვის ადგილის გამოყოფის მოთხოვნა;
- სამარშრუტო ავტობუსების პარკის განახლება კომფორტული მუნიციპალური დიდი და მომცრო ავტობუსებით;
- მეტროს ძველი შემადგენლობების გარემონტება და ახალი შემადგენლებების დამატება;
- მეტროპოლიტენის განვითარება, მცხეთა-თბილისი-რუსთავის დამაკავშირებელი მეტროს პროექტის დაწყება;
- ტრამვაის ხაზის გაკეთება გარკვეულ უბნებში.
თენგიზ შერგელაშვილი - „შენების მოძრაობა"
- ვებგვერდის გაკეთება, სადაც განთავსდება ინფორმაცია ქვეითად მოსიარულეთა, ბავშვების, მოხუცების და შშმ პირთა გადაადგილების შეფერხებებზე და შემდეგ ამ გვერდის მეშვეობით პრობლემების მოგვარების სქემის შედგენა;
- პარკირების სისტემის განვითარების ერთიანი სტრატეგია;
- საცობების პროგნოზირებისა და პარკირების ფასწარმოქმნის ინტეგრირებული მოდელი;
- ხელშეკრულების გადახედვა „სითი პარკთან“;
- ავტობუსების პარკის განახლება;
- სამარშრუტო ტაქსების მოძრაობის სქემების რეორგანიზაცია;
- სხვადასხვავადიანი სააბონენტო სისტემის დანერგვა;
- გაიწერება თბილისში 10 წლის განმავლობაში ჩქაროსნული ტრამვაის ხაზების გაყვანის დეტალური გეგმა. პირველ 4 წელიწადში აშენდება და ამოქმედდება 11 კმ-იანი ჩქაროსნული ტრამვაის ხაზი;
- აშენდება ყოველდღიურ სატრანსპორტო დანიშნულებაზე ორიენტირებული საბაგირო გზები;
- რეგულაციები ტაქსებისთვის და ტაქსების პარკის განახლება.
გიორგი ვაშაძე - „ერთობა ახალი საქართველო"
- ელექტრო საზოგადოებრივი ტრანსპორტის განვითარება;
- ყველა ტაქსი იქნება ელექტრო;
- უსაფრთხო გზების და გადასასვლელების გაკეთება;
- საფეხმავლო ქუჩებისა და ველობილიკების მოწყობა;
- ვერტიკალური პარკირების სისტემის დანერგვა;
- სპეციალური ინფრასტრუქტურის მოწყობა შესაბამისი საჭიროების მქონე პირთათვის.
კახა კალაძე - „ქართული ოცნება - დემოკრატიული საქართველო"
- სატრანსპორტო პოლიტიკის კონცეფციის შექმნა;
- საზოგადოებრივი ტრანსპორტის ახალი სამარშრუტო სქემის შექმნა;
- ტრანსპორტის მართვის სისტემის შექმნა, რომელიც დაადგენს მოძრაობის შეფერხების მიზეზებს და განსაზღვრავს მისი თავიდან აცილებს მექანიზმებს;
- მეტროპოლიტენის რეაბილიტაციის გაგრძელება;
- მეტროს ახალი ხაზების პროექტირება;
- მეტროს ინტეგრირება სარკინიგზო ინფრასტრუქტურასთან;
- თბილისის ავტობუსის პარკის განახლება ეკოლოგიურად სუფთა და ადაპტირებული ავტობუსებით;
- 500 ახალი გაჩერების დამონტაჟება;
- მიკროავტობუსების პარკის განახლება;
- ტაქსების სექტორის მოწესრიგება;
- საბაგირო ტრანსპორტის განვითარება: რუსთაველი-მთაწმინდის საბაგირო ხაზის მშენებლობა და სხვა ხაზების დაპროექტება;
- ტურისტული მიზნებისთვის მტკვარზე წყლის ტრანსპორტის განვითარება;
- რამდენიმე ახალი სატრანსპორტო დერეფნის მოწყობა;
- მარჯვენა და მარცხენა სანაპიროების დამაკავშირებელი საავტომობილო ხიდის მშენებლობა სამტრედიის ქუჩასთან;
- მინიმუმ ათი საგზაო-ინფრასტრუქტურული პროექტის გაკეთება;
- პარკირების მართვის ეფექტიანი სისტემის განვითარება, პირობების მომზადება, რათა სამომავლოდ პარკირების მართვა განხორციელდეს უშუალოდ მუნიციპალური სამსახურის მიერ;
- ახალი მიწისქვეშა და მიწისზედა პარკინგების მოწყობა;
- კომფორტული პირობების შექმნა ქვეითებისა და ველოტრანსპორტის გადაადგილებისთვის. ტროტუარების გეომეტრიის გაუმჯობესება, ახალი ველობილიკებისა და ველოსადგურების შექმნა;
- საგზაო უსაფრთხოების სტრატეგიის შემუშავება. ავტოსაგზაო შემთხვევების შესახებ მონაცემების შეგროვების სისტემის ამოქმედება.
ალექსანდრე ელისაშვილი - თბილისის მერობის დამოუკიდებელი კანდიდატი
- მეტროში 7 ახალი შემადგენლობის დამატება;
- კომფორტული ტრამვაის ხაზი, რომელიც დაფარავს სატრანსპორტო სისტემას მოკლებულ უბნებს;
- საზოგადოებრივი ტრანსპორტის სისტემის ორად გაყოფა:
- პრიორიტეტულ ხაზებზე, მხოლოდ დიდი მოცულობის სატრანსპორტო საშუალებები;
- ნაკლებად პრიორიტეტულ ხაზებზე, ახალი ავტობუსების შემოყვანამდე სამარშრუტო ტაქსების გადანაწილება;
- ხელშეკრულების გაუქმება „სითი პარკთან“;
- მიწისქვეშა და მიწისზედა პარკინგის ადგილების მოწყობა ახალი კომპანიის მეშვეობით.
