პირიქითა ხევსურეთში, არხოტში, თემის გადაწყვეტილებით, ნადირობა და თევზაობა (ტახედან ხეობის ბოლომდე) სალოცავში ხატის წინაშე დაფიცებით აკრძალეს. ხუცესმა, გოჩა ჯაბუშანურმა მთავარანგელოზის სალოცავში ხატზე ფიცი დადო. ვიდეოს სოციალურ ქსელში გაგა ცისკარაული ავრცელებს:
„წინ-წინ უნდა გავწყვიტოთ ამ მიწა-წყლის ავ-კარგიანობის, დაცვისა და მოვლა-პატრონობის ამბავი. არის სამსახური, რომელსაც ევალების. საჯარო სამსახურში არიან ჩვენი ძმები, ჩვენი ძმისშვილები, თუ მოსახლეობა არ დავუდექით გვერდში, არაფერი არ გამოვა, ვერაფერს ვერ გახდებიან ისინი.... სხვა გზა არ დაგვრჩა, ხელიდან გვეცლება ნადირ-ფრინველი, წყლის ბინადარნი.
დღეის ამას იქეთ, ყველამ იცოდეს, რომ ნადირობას ჩვენ დავუდებთ ზღვარს, ეს იმას ნიშნავს, რომ იქნების ადგილი, სადაც არ გავარდების თოფი ნადირისკენ, არ გავარდების თოფი ფრინველისკენ, შავინახავთ, დავიცავთ და ვუპატრონებთ. გვერდში დავუდგებით, ვისაც ეს საქმე სახელმწიფოსგან ავალია“,- ამბობს ხუცესი.