პარტია „გამარჯვებული საქართველოს“ ლიდერი და ამჟამად წინასწარ პატიმრობაში მყოფი ირაკლი ოქრუაშვილი, საპყრობილიდან ოჯახის წევრებთან სატელეფონო კომუნიკაციის აკრძალვას აპროტესტებს. თავდაცვის ყოფილი მინისტრის ფეისბუკზე, მისი სახელით გამოქვეყნდა პოსტი, რომ ამით მისი კანონიერი უფლებები იზღუდება.
„ივანიშვილი მშიშარა რომ არის, გასაგებია. ეს იქედანაც გამოჩნდა გირაოთი რომ არ მიშვებს, მაგრამ ასეთი მეწვრილმანე თუ იქნებოდა, კვირაში ერთხელ ბავშვებთან დარეკვასაც ამიკრძალავდა, (რის უფლებასაც კანონი მაძლევს) ნამდვილად არ მეგონა" ვკითხულობთ ოქრუაშვილის ფეისბუკზე.
მთავარ პროკურატურაში ადასტურებენ, რომ ბრალდებულ ირაკლი ოქრუაშვილს აკრძალული აქვს ნებისმიერი სატელეფონო კომუნიკაცია. ამ შეზღუდვის მიზეზად კი ასახელებენ ბრალდებულის მხრიდან იმ მოწმეებზე ზემოქმედების რისკს, რომლების სასამართლოში ამ ეტაპზე არ არიან დაკითხულნი.
