"გაეთრიე ჩემი საძინებლიდან", "ჩვენ არ გვეხება სხვისი პირადი ცხოვრება, მაგრამ გვეხება ის, რომ ჩვენი რეაქციით ადამიანებს აშინებენ და აშანტაჟებენ", "უკონტროლო მოსმენები დაკანონდა", - დღეს ამ შინაარსის პლაკატებით ფილარმონიიდან მთავრობის კანცელარიამდე საპროტესტო მსვლელობა მოეწყო.
აქციის მინაწილეები მოითხოვენ, რომ აქამდე ჩადენილი მსგავსი ტიპის გამოუძიებელი დანაშაულიც გამოიძონ, საგამოძიებო პროცესებში უცხოელი ექპეტებიც ჩაერთონ და სახელმწიფომ შეიმუშაოს სტრატეგია მოქალაქეთა პირადი ცხოვრების ხელშეუხებლობის უზრუნველსაყოფად.
აქციის მონაწილე ბაია პატარაია ამბობს, რომ ამ დანაშაულს აქვს მკვეთრად გამოხატული გენდერული ხასიათი და გავრცელებული პირადი ცხოვრების ამსახველი ჩანაწერები ძირითადად, ქალების წინააღმდეგ არის მიმართული.
"ჩვენ გვინდა მეტი ქალი პოლიტიკაში, ჩვენ არ გვინდა ქალებს ასე ესხმოდნენ თავს! გაეთრიეთ ჩვენი საძინებლებიდან!", - ამბობს ბაია პატარაია.
გარდა არასამთავრობო ორგანიზაციებისა და მოქალაქეებისა, აქციას პროფკავშირთა გაერთიანება და რამდენიმე ოპოზიციური პარტიის წარმომადგენლებიც შეუერთდნენ.
პარალელურად, მსგავსი შინაარსის აქციები საქართველოს სხვადასხვა ქალაქში გაიამართა. აქციის ორგანიზატორები ამბობენ, რომ პროტესტს არ შეწყვეტენ, სანამ არ ხელისუფლება დამნაშავეებს არ გამოავლენს.