"2011 წელს ჩემი ჯანმრთელობა დავაზღვიე სახელმწიფო სადაზღვევო პროგრამით, მაგრამ, მიუხედავად სხვადასხვა სახის მომსახურებით უზრუნველყოფისა, სადაზღვევომ არ დამიფინინსა გეგმიური სტაციონარული მომსახურება და მიზეზად სრულიად უსაფუძვლო რამ დამისახელა (ამ მიზეზის უსაფუძვლობას ერთ-ერთი მკურნალი ექიმიც ადასტურებს). ასევე გაუგებარია, ჩემი მოთხოვნის მიუხედავად, კომპანიამ ოფიციალური პასუხი რატომ არ გამცა, სადაც წერილობით ახსნიდა, რატომ არ დამიფინანსა ქირურგიული მომსახურება"
ეს ერთი კონკრეტული ადამიანის შემთხვევაა, რომელსაც სადაზღვევო კომპანიამ გარკვეული სახის მომსახურება არ დაუფინანსა. რესპონდენტის თხოვნით არ ვასახელებთ წყაროს სახელს და, შესაბამისად, არც სადაზრვევო კომპანიას, თუმცა, ფაქტია, რომ დღესდღეობით კლიენტები უკმაყოფილებას სულ უფრო მეტად გამოთქვამენ.
სხვადასხვა სოციალურ ქსელსა და ფორუმზე ამ საკითხს საკმაოდ ხშირად განიხილავენ. ზემოთ მოყვანილი შემთხვევა ჯანმრთელობის დაზღვევას ეხებოდა, თუმცა, მსგავსი უკმაყოფილება სხვა სახის(ქონების, მოგზაურობის და სხვ.) მომსახურებებშიც შეინიშნება.
ამ დროს ორი ძირითადი პრობლემა იჩენს თავს. პირველ ყოვლისა, ესაა პროვაიდერი სამედიცინო დაწესებულების მწირი არჩევანი, ამით გამოწვეული უკმაყოფილება და მთავარი - სადაზღვევო კომპანიების ხელშეკრულების ნაწილობრივი ბუნდოვანება. ხშირად, ხელშეკრულებაში ორაზროვნადაა წარმოდგენილი, თუ როდის უნარუნაზღაურებს კომპანია კლიენტს მომსახურებას. ასევე, დაკვირვებებმა დაადასტურა, რომ ხანდახან დაზღვეული პირიც გარკვეულწილად უპასუხისმგებლობას იჩენს და ხელშეკრულებას ძალიან ზერელედ ან საერთოდ არ ეცნობა (თუმცა, კორპორატიული დაზღვევის დროს სადაზღვევო კომპანიასთან ხელშეკრულებას ორგანიზაცია აწერს ხელს).
2011 წლის მაისში სპეციალურად ამ პრობლემების მოსაგვარებლად მედიაციის სამსახური ჩამოყალიბდა, რომელიც სხვადასხვა დავის გადაწყვეტის დროს სადაზღვევო კომპანიასა და სახელმწიფო პროგრამით დაზღვეულ მომხმარებელს შორის შუამავლობს.
გურამ კერესელიძე, მედიაციის სამსახურის დირექტორი ამბობს, რომ „დღის განმავლობაში მედიაციის ცხელ ხაზზე 50-60 შეტყობინება შემოდის, რომლებსაც 24-დან 48 საათის განმავლობაში განვიხილავთ. ჩვენ მხოლოდ სახელმწიფო პროგრამებით დაზღვეულ მოქალაქეებს ვემსახურებით, ანუ ეს ეხება სოციალურად დაუცველ მოსახლეობასა და პედაგოგებს, მაგრამ 2012 წლის 1 სექტემბრიდან პროექტში პენსიონერებისა და მცირეწლოვანების ჩართვასაც ვგეგმავთ".
კითხვაზე, თუ რა შინაარსის საჩივრებს განიხილავენ ყველაზე ხშირად, გურამ კერესელიძემ გვიპასუხა, რომ ეს შეკითხვები ძირითადად ინფორმაციული შინაარსისაა. მოქალაქეებს სრულყოფილი სამედიცინო დახმარების მისაღებად საჭირო პირობები აინტერესებთ. ასევე, მეტ-ნაკლებად პრობლემატური თემაა მოლოდინის რეჟიმი. ეს პერიოდი 6 თვე გრძელდება, და, რეალურად, სწრაფ სამედიცინო მომსახურებაში მოქალაქეებს პრობლემებს უქმნის.
ასევე, საინტერესოა, საქართველოს რომელი რეგიონიდან შედის ძირითადად განცხადებები. სტატისტიკა გვიჩვენებს, რომ დედაქალაქის მეტად ინფორმირებულობის გამო, მოქალაქეები, ძირითადად, თბილისიდან რეკავენ( 48%). ამ მხრივ გამოირჩევა იმერეთის რეგიონიც.
აღსანიშნავია ისიც, რომ სარჩელის შეტანის დროს ხშირად სადაზღვევო დავების განხილვა თვეობით იჭიმება. იურისტი ირაკლი გუნიავა გაზეთ "რეზონანსთან" საუბრისას აცხადებს, რომ "ეს განსაკუთრებულად სოციალურად დაუცველ ფენას ეხება, რადგან, ძირითადად, საჩივარს უარყოფითი პასუხი მოჰყვება ხოლმე. სასამართლოში მიმართვისას კი დაზღვეულმა სარჩელის სადავო თანხის 3% უნდა გადაიხადოს. Aმას საადვოკატო მომსახურების ხარჯები ემატება, რისი შესაძლებლობაც სიღარიბის ზღვარს ქვემოთ მყოფ პირს არ აქვს. სარჩელის შეტანიდან ინსტანციის სასამრთლომ გადაწყვეტილება 2 თვეში უნდა გამოიტანოს, თუმცა სხდომების გადადება და პროცესის გაწელვა ჩვენში დამკვიდრებული პრაქტიკაა".
მედიაციის სამსახურის მიმართ კრიტიკას გურამ კერესელიძე უსაფუძვლოდ მიიჩნევს და აცხადებს, რომ ნებისმიერი განცხადება, რომელიც შედის მედიაციის სამსახურში განიხილება სამართლიანად. "ყველა მოქალაქეს, რომელიც სახელმწიფო პროგრამითაა დაზღვეული, ჩვენი სამსახური 24 საათის განმავლობაში ადვოკატირებას უწევს. სადაზღვევო კომპანიების მხრიდან ყოველი დაუსაბუთებელი უარი ძალიან ოპერატიულად და სამართლიანად განიხილება"- აცხადებს მედიაციის სამსახურის უფროსი.
რაც შეეხება სადაზღვევო კომპანიების მიხედვით შემოსულ მომართვებს, ამ მხრივ "ალფა", "ირაო" და "ჯი-პი-აი ჰოლდინგი" ლიდერობენ, მათ მიმართ ყველაზე მეტი საჩივარი შემოდის და 65 % სოციალურად დაუცველი მოსახლეობის პრობლემებს ეხება.
