ეკონომიკის მინისტრ გიორგი ქუმსიშვილის თქმით, მას დაურეკეს და აცნობეს, რომ სამინისტროს ცენტრალურ აპარატში ინფორმაციის გაცემაზე 578 მოთხოვნა შევიდა, საიდანაც 547-ს პასუხი გაეცა. მისი თქმით, IDFI-სგან მიღებულ 6 მოთხოვნაზე არ არის პასუხი გაცემული, თუმცა საქმის წარმოება მიმდინარეობს.
იუსტიციის მინისტრმა თეა წულუკიანმა IDFI-ს კვლევის შედეგზე კომენტარი არ გააკეთა.
„ინფორმაციის თავისუფლების განვითარების ინსტიტუტმა” დღეს 2010-2015 წლებში საჯარო ინფორმაციის ხელმისაწვდომობის კუთხით არსებული მდგომარეობა შეაჯამა.
2012 წლის არჩევნების შემდეგ მნიშვნელოვნადაა გაუმჯობესებული საჯარო ინფორმაციის ხელმისაწვდომობის დონე, თუმცა IDFI-ის მონაცემებით, 2014 წელთან შედარებით 2015 წელს მნიშვნელოვნად გააუარესეს ხელმისაწვდომობის მაჩვენებელი იუსტიციის სამინისტრომ - 46%-ით, ეკონომიკისა და მდგრადი განვითარების სამინისტრომ - 50%-ით და მთავრობის ადმინისტრაციამ 75%-ით.
2010-2015 წლებში ყველაზე ანგარიშვალდებულ დაწესებულებებად გამოვლინდა სახალხო დამცველის აპარატი და დმანისის მუნიციპალური გამგეობა. 2015 წელს სპეციალური სიგელით დაჯილდოვდნენ: რეგიონული განვითარებისა და ინფრასტრუქტურის სამინისტრო, სპორტისა და ახალგაზრდობის საქმეთა სამინისტრო, დევნილთა სამინისტრო, გარემოსა და ბუნებრივი რესურსების სამინისტრო და აჭარის მთავრობის აპარატი და ყველა სამინისტრო.
