თურქულმა სასამართლომ ორ სირიელს ალან ქურდისა და კიდევ 4 ადამიანის დაღუპვის საქმეში 4-წლიანი პატიმრობა მიუსაჯა.

ალან ქურდი 3 წლის სირიელი ბიჭია, რომლის სანაპიროზე გამორიყული ცხედრის ფოტოებმაც 2015 წლის სექტემბრის მიგრანტთა კრიზისის დროს მთელი მსოფლიო შეძრა.

მუფავაკა ალაბაში და ასემ ალფრადი ბოდრუმში გაასამართლეს იმავე ქალაქში, სადაც ბავშვის გვამი გამოირიყა.

ალაბაშსა და ალფრადს 35 წლით თავისუფლების აღკვეთა ემუქრებოდათ. საბოლოოდ მათ თურქეთიდან საბერძნეთში ადამიანების უკანონოდ გადაყვანა დაედოთ ბრალად, „გაუფრთხილებლობით სიცოცხლის მოსპობის“ ნაწილში კი გაამართლეს. 

დღემდე ათასობით მიგრანტი და ლტოლვილი გადადის  საბერძნეთის კუნძულებზე თურქეთიდან.

საბერძნეთში გადასვლის მცდელობისას დაიღუპნენ  ალანის 5 წლის ძმა გალიბი და დედა - რიჰანიც. ალან ქურდის მამა აბდულა ამჟამად ერაყში ცხოვრობს.