თსუ-ის პროფესორმა გიორგი გოგსაძემ აკადემიური საბჭო დატოვა. "ლიბერალთან" საუბრისას, გოგსაძემ გადაწყვეტილების მიღების მიზეზად განმარტა,რომ აკადემიურ საბჭოში მუშაობის სურვილი აღარ აქვს.
"წამოვედი იმიტომ, რომ სურველი აღარ მაქვს გავაგრძელო მუშაობა აკადემიურ საბჭოში. რადგან ვთვლი, რომ ვერ მოვახერხებ იმის რეალიზაციას რაც მინდა. ჩემს თავზე ძალიან დიდ პასუხისმგებლობას ვიღებ, ჩემი დანაშაულიც არის იმაში, რომ აკადემიური საბჭო თავიდან პასიური იყო. მაგრამ, ვფიქრობ, რომ არასწორი შეფასებები კეთდებოდა მთელი ამ დროის განმავლობაში, არასწორი აქცენტები იყო დასმული, ნაწილი სტუდენტების გამოვიყვანეთ გმირებად, ნაწილი გამოვიყვანეთ ზონდერებად და ქურდებად, რაც დაუშვებელია. უნივერსიტეტი უნდა იყოს ერთიანი. ამ ერთიანობას ხელი უნდა შეეუწყოს, როცა ეს არ ხდება, მივიღე ის გადაწყვეტილება, რომელიც მივიღე",- ამბობს გოგსაძე.
მისი თქმით, განცხადება საბჭოს დატოვების თაობაზე რექტორატს უკვე გადაუგზავნა და მისი გადაწყვეტილების მიზეზები უფრო დეტალურად სწორედ იქაა განმარტებული.
აკადემიური საბჭო გუშინ კიდევ ერთმა წევრმა, პროფესორმა მარიამ გერსამიამ დატოვა. "მე ვდგები დღეს იქ, სადაც არასოდეს არ მოხდება სტუდენტების გაყოფა, ეს არის აუდიტორია. მე იქ შევალ და წავიკითხავ ლექციას როგორც პროფესორი და არა აკადემიური საბჭოს წევრი, " - განაცხადა მან.
როგორც მარიამ გერსამია, ასევე გიორგი გოგსაძე თსუ-ის აკადემიურ საბჭოში სოციალურ და პოლიტიკურ მეცნიერებათა ფაკულტეტიდან იყვნენ.
