ფონდ ,,ღია საზოგადოება - საქართველოს" ოფისში ჰომოფობიასა და ტრანსფობიასთან ბრძოლის კვირეულის ფარგლებში მრგვალი მაგიდა გაიმართა. დისკუსიის თემა სექსუალური ორიენტაციისა და გენდერული იდენტობის საფუძველზე ლგბტ ადამიანთა მიმართ განხორციელებული ფსიქოლოგიური და ფიზიკური ძალადობა იყო.
ეკა აღდგომელაშვილმა, ნათია გვინიაშვილმა და სოფიო ჯაფარიძემ მოხსენებები წაიკითხეს ლგბტ ადამიანთა დისკრიმინაციის ფორმებისა და სიხშირის, მათი სპეციფიკური საჭიროებებისა და ჰომოფობიურ საქმეთა სამართალწარმოების შესახებ.
ამჟამად სტრასბურგის ადამიანის უფლებათა სასამართლო განიხილავს საქმეს ,,აღდგომელაშვილი და ჯაფარიძე" საქართჳელოს წინააღმდეგ, რომელიც სტრასბურგში საქართველოდან პირველი საქმეა ჰომოფობიასა და სექსუალური ნიშნით დისკრიმინაციის შესახებ. საქმე 2009 წელს სამართალდამცავების მიერ ორგანიზაცია ,,ინკლუზივში" სამართალდამცავების მხრიდან პროფესიული მოვალეობის შესრულების დროს ლგბტ ადამიანებისადმი გამოვლენილ სიძულვილს ეხება.
შეხვედრაზე ხაზი გაესვა, რომ საქართველოში ლგბტ ადამიანთა მიმართ ძალადობის ფაქტები აღრიცხული არაა, თავად ეს ადამიანები კი ჩაკეტილ ჯგუფებად გვევლინებიან. ისინი ძალადობას განიცდიან როგორც ოჯახსი,. სკოლასა და უნივერსიტეტებში, მეგობრების წრეში, სამართალდამცავების მხრიდან და ფსიქოლოგებიდანაც კი.
განსაკუთრებით რთულ ჯგუფად შეხვედრაზე ტრანსგენდერთა ჯგუფი დასახელდა, რომლებსაც ერთმანეთშიც არ აქვთ განვითარებული სოციალური კავშირები. სახელმწიფოს თუ საზოგადოების დონეზე კი ამ ადამიანთა უფლებებისა და ინტერესების სრული იგნორირება ხდება - ტრანსგენდერ ადამიანებს ოფიციალურ დოკუმენტებში სქესის შეცვლა არ შეუძლიათ თუ სქესის კორექციის სრულ ოპერაციას არ ჩაიტარებენ. ეს კი , გარდა იმისა რომ თერაპიის ხანგრძლივ პროცედურებთან და დიდ ხარჯებთანაა დაკავშირებული, ზოგჯერ ტრანსგენდერთა სურვილებსაც არ შეესაბამება.
1990 წლის 17 მაისს ჯანდაცვის მსოფილო ორგანიზაციამ ჰომოსექსუალობა ფსიქიკური დაავადების სიიდან ამოიღო. ამიტომ, 17 მაისი მსოფიოში ჰომოფობიასა და ტრანსფობიასთან ბრძოლის საერთაშორისო დღედ აღინიშნება.
ამ დღეს საქართველოში მოქმედი სხვადასხვა ორგანიზაციებიც აღნისნავენ. ,,ქალთა ინიციატივების მხარდამჭერმა ჯგუფი" 14-დან 19 მაისის ჩათვლით ჰომოფობიასა და ტრანსფობიასთან ბრძოლისადმი მიძღვნილ კვირეულს ატარებს.
