ათათურქის აეროპორტში მომხდარ ტერაქტში ეჭვმიტანილი სამი თვითმკვლელი ტერორისტი ეროვნებით რუსი, უზბეკი და ყირგიზია. Reuters-ის ცნობით, ინფორმაციის წყარო თურქეთის ოფიციალური პირები არიან.

მათ თვითმკვლელ ტერორისტებზე დამატებითი დეტალები მედიისთვის არ გაუმხელიათ. ასევე უცნობი რჩება ტერორისტების სახელები, გამოძიების ინტერესებიდან გამომდინარე.

ხელისუფლების მომხრე გაზეთი „იენი საფაკის" ცნობით, რუსი თავდამსხმელი დაღესტნიდან იყო.

ყირგიზეთის უშიშროების სამსახურმა განაცხადა, რომ გამოძიება მიმდინარეობს, უზბეკეთის უშიშროების სამსახურს კი კომენტარი არ გაუკეთებია. 

„იენი საფაკის" ცნობით, ტერორისტული აქტის ორგანიზატორი ეროვნებით ჩეჩენი ახმედ ჩატაევია. ის ისლამური სახელმწიფოს ერთ-ერთ ლიდერად ითვლება და პასუხისმგებელია რუსი მებრძოლების გაწვრთნაზე. მას რუსული მხარეც ეძებს. თურქული მხარე Reuters-ს ჩატაევთან დაკავშირებით ინფორმაციას არ უდასტურებს.

თურქეთის პოლიციამ სტამბოლში ათათურქის აეროპორტში მომხდარ ტერაქტთან დაკავშირებით 13 პირი დააკავა, რომელთაგან 3 უცხოელია.

ბოლო მონაცემებით, ათათურქის აეროპორტში ტერაქტს 42 ადამიანი ემსხვერპლა, ხოლო 239 დაშავდა.

სამშაბათს ათათურქის აეროპორტში სამმა ტერორისტმა ცეცხლი გახსნა და ასაფეთქებელი მოწყობილობა აამოქმედა.

ორმა მათგანმა აფეთქება ტერმინალის შენობაში მოაწყო, მესამემ კი თავი ავტოსადგურზე აიფეთქა.