მოსახლეობის 43% მომავალში ისარგებლებდა „Yandex Taxi-ის" მომსახურებით, - ამის შესახებ ნათქვამია ACT- ანალიზისა და კონსულტაციის ჯგუფის კვლევაში, რომელიც კომპანია „Yandex Taxi-ის" ცნობადობისა და სერვისით სარგებლობის სიხშირეს ეხებოდა.
მათი თქმით, კვლევის შედეგად გაირკვა, რომ თბილისის მოსახლეობის უმრავლესობას (73%) სმენია „Yandex Taxi-ის" შესახებ, ხოლო 12%-ს უსარგებლია კიდეც მათი სერვისით.
ონლაინკვლევა კომპანია „ეი-სი-თიმ” ჩაატარა 2016 წლის სექტემბერში. შემთხვევითი შერჩევით გამოიკითხა თბილისის 404 ზრდასრული მცხოვრები. ცდომილება არ აღემატება 4.9%-ს.
ეი-სი-თი - ანალიზისა და კონსულტაციის ჯგუფი წარმოადგენს კვლევებისა და კონსულტაციის გლობალურ კომპანიას, რომელიც მოიცავს დსთ-ს და აღმოსავლეთ ევროპის ქვეყნებს, ოფისებით საქართველოში, აზერბაიჯანსა და ყაზახეთში.
რუსული კომპანია „იანდექს ტაქსი" ქართულ ბაზარზე 23 აგვისტოს შემოვიდა, რასაც საზოგადოების გარკვეული ნაწილის პროტესტი მოჰყვა. ამის მიზეზი კი ის იყო, რომ „იანდექსის” ოფიციალურ ვებგვერდზე საქართველოს რუკა აფხაზეთისა და ცხინვალის გარეშეა დატანილი.
