თეიმურაზ ტუღუშის კანდიდატურა კანონმდებლობით დადგენილი წესით წარვადგინეთ და სხვა რაიმე ინდივიდუალური ჩარევა არ ყოფილა, - განაცხადა უზენაესი სასამართლოს თავმჯდომარემ, ნინო გვენეტაძემ უზენაესი სასამართლოს პლენუმის მიერ საკონსტიტუციო სასამართლოს მოსამართლედ თეიმურაზ ტუღუშის არჩევის შემდეგ.
„სრული პასუხისმგებლობით მინდა განვაცხადო, რომ ბატონი თეიმურაზი ჩემი კანდიდატურაა. ბუნებრივია, მას წინ უძღოდა კონსულტაციები, რაც სამუშაო რეჟიმში მიმდინარეობდა და უამრავი ადამიანის მოსაზრება, შეფასება იყო გათვალისწინებული“, - განაცხადა ნინო გვენეტაძემ.
რაც შეეხება შეკითხვას, იყო თუ არა მათ შორის იუსტიციის უმაღლესი საბჭოს მდივნის ლევან მურუსიძის მოსაზრება, ნინო გვენეტაძემ აღნიშნა, რომ არ ყოფილა და საუბარი აქვს უფრო ფართო წრეებზე.
„ჩემი ვალდებულება და პასუხისმგებლობა არის ის, რომ პლენუმს წარვუდგინო კანდიდატურა, რომელიც თავისი გადაწყვეტილებით ან დამეთანმხმება ან არა. პასუხისმგებლობას ამ შემთხვევაში ვიღებ ჩემს თავზე, თუმცა კოლეგებიც ინაწილებენ ამ პასუხისმგებლობას, პლენუმის სახით. ყველა ის კითხვები, რომელიც საზოგადოებას ამ საკითხთან დაკავშირებით ჰქონდა, ვფიქრობ, არაა მნიშვნელოვანი და სერიოზული ამ საკითხში. კანდიდატურა წარმოდგენილი იყო კანონმდებლობით დადგენილი წესით და რაიმე ინდივიდუალური ჩარევა, რომელიც გადაწყვეტილების მისაღებად იქნებოდა მნიშვნელოვანი, არ ყოფილა“, - განაცხადა ნინო გვენეტაძემ.
