დღეს, თბილისის სახელმწიფო უნივერსიტეტში სტუდენტური მოძრაობა „აუდიტორია 115-ის“ წევრებმა საპროტესტო აქცია გამართეს, რის გამოც უნივერსიტეტში ახალი სასწავლო წლის დაწყებასთან დაკავშირებით დაგეგმილი საზეიმო ღონისძიება ჩაიშალა.

მოგვიანებით, რექტორთან, გიორგი შარვაძიძესთან  შეხვედრისას  ერთ-ერთი მთავარი მოთხოვნა, რომელიც „აუდიტორია 115-მა“ წამოაყენა იყო ის, რომ დაუყოვნებლივ გაეხსნას ბაზა იმ სტუდენტებს, რომლებსაც თანხის გადაუხდელობის გამო არ ეძლევათ აკადემიური რეგისტრაციის საშუალება.

„აუდიტორია 115-ის“ წევრის გიორგი ჯავახაძის თქმით, დღეს გამართულ სხდომაზე აკადემიურმა საბჭომ არ იმსჯელა იმ სტუდენტებზე, რომელთაც თანხის გადაუხდელობის გამო ბაზები არ გაეხსნათ. „ამ საკითხზე დღეს მსჯელობა არ ყოფილა და ისინი საუბრობენ ზოგადად განვითარების კონცეფციაზე, რომელიც უნივერსიტეტში არაფერს შეცვლის. „აუდიტორია 115“-მა მათ პირადად სთხოვა, რომ დღესვე გადაწყვეტილიყო საკითხი, რა ბედი ეწევათ იმ სტუდენტებს, რომლებიც ვერ ირჩევენ საგნებს. თუ ჩვენ რექტორისგან კონკრეტულ პასუხს ვერ მივიღებთ, მაშინ აუდიტორიის ქმედებები იქნება მაქსიმალურად რადიკალური”, - განაცხადა გიორგი ჯავახაძემ.

აკადემიურ საბჭოსთან შეხვედრის დასრულების შემდგომ, რექტორის, გიორგი შარვაშიძის თქმით, შეხვედრისას საუბარი იყო უნივერსიტეტისათვის სტრატეგიული განვითარების გეგმის შემუშავებაზე. მისი თქმით, შეიქმნება საინიციატივო ჯგუფი, რომელშიც ჩართვის შესაძლებლობა ყველა დაინტერესებულ მხარეს მიეცემა. 

„რაც მეტი მონაწილე ეყოლება ამ პროცესს და რაც მეტი პროფესიონალი ჩაერთვება ამ პროცესში უკეთესია. ამიტომ, ვთხოვეთ საბჭოს იმ წევრებს, რომლებიც განათლებით არიან განათლების სპეციალისტები და იურისტები, რომ ჩაერთონ მუშაობაში. არის საკითხები, რომელთა გადაწყვეტაც უნივერსიტეტის კომპეტენციაა და არის რიგი საკითხებისა, რომელიც აღემატება უნივერსიტეტის კომპეტენციას, ასეთია საკანონმდებლო ცვლილებები, რომლის ინიცირებაც უნდა მოხდეს. უნივერსიტეტს აქვს შესაბამისი ინტელექტუალური რესურსი, საიმისოდ, რომ თსუ გახდეს პოზიტიური ცვლილებების კატალიზატორი“,- თქვა მან.

საბჭოს სხდომის დასრულების შემდგომ ცნობილი გახდა, რომ  სასწავლო პროცესის ვადების ბრძანებაში, რექტორის ბრძანებით, ცვლილება შევიდა, უფრო კონკრეტულად კი ადმინისტრაციული რეგისტრაცია (სწავლის საფასურის გადახდა) და აკადემიური რეგისტრაცია (სასწავლო კურსების არჩევა) 3 ოქტომბრის ჩათვლით ხანგრძლივდება. რაც გულისხმობს, რომ ამ სტუდენტებს თანხის შეტანის ვადა გაუხანგრძლივდებათ. 

როგორც თსუ-ის სასწავლო პროცესის მართვის დეპარტამენტის უფროსმა, დალი კანდელაკმა განაცხადა, უნივერსიტეტში შემოსულია იმ სტუდენტების განცხადებები, რომელთაც წინა სემესტრის დავალიანება აქვთ, ამჟამად თითოეული ასეთი განცხადების შესწავლა მიმდინარეობს, ვადებში ცვლილება კი სწორედ იმისთვის მოხდა, რომ ამ სტუდენტებს პრობლემები არ შეექმნათ.

თსუ-ში მოქმედი სასწავლო პროცესის მარეგულირებელი წესის მიხედვით, ბაზები იხურება სააუდიტორო მეცადინეობის დაწყებიდან ერთი კვირის შემდეგ. ვინაიდან მეცადინეობები დაიწყო დღეს, ბაზები უნდა დახურულიყო 3 ოქტომბერს,- „მაგრამ პრობლემა ისაა, რომ არიან სტუდენტები, რომლებსაც წინა სემესტრების სწავლის საფასურის დავალიანება ჰქონდათ, მათი განცხადებების განხილვა მიმდინარეობს, ზის სპეციალური კომისია, რომელიც ინდივიდუალურად უკავშირდება თითოეულ სტუდენტს და აკონკრეტებინებენ თუ რამდენი თანხის გადახდა შეუძლიათ მათ ამ ეტაპზე, შესაბამისად, სწორედ ამ კატეგორიის სტუდენტებისთვის შედის ცვლილება სასწავლო პროცესის ვადებში“,- თქვა მან.