ამჟამად, გელათის ტაძარში წყალი აღარ ჩადის, - ამის შესახებ ინფორმაციას კულტურული მემკვიდრეობის სააგენტო ავრცელებს.
მათი ინფორმაციით, დიდთოვლობისა და გადაუღებელი წვიმის შემდეგ, 11 დეკემბრის ღამეს, გელათის ტაძრის მკლავების გადახურვიდან, რომელიც საბჭოთადროინდელი და მოძველებულია, წყალმა გაჟონა.
როგორც სააგენტოში აცხდებენ, სარეაბილიტაციო სამუშაოები რესტავრატორებმა მეორე დღესვე დაიწყეს და ორ დღეში დაასრულეს.
„კულტურული მემკვიდრეობის ეროვნული სააგენტოს გენერალურმა დირექტორმა, ნიკოლოზ ანთიძემ გუშინ, 13 დეკემბერს, საღამოს ადგილზე დაათვალიერა შესრულებული სამუშაო. წლების განმავლობაში მიმდინარეობს გელათის სამონასტრო კომპლექსის გეგმური სარეაბილიტაციო სამუშაოები. კომპლექსის ამ ნაწილის სრული რეაბილიტაცია პროექტით მომავალი წლისთვის იგეგმებოდა, მაგრამ, შექმნილი ვითარებიდან გამომდინარე, რეაბილიტაციის პროცესი გაზაფხულზე გაგრძელდება, მანამდე კი სააგენტოსა და სამუშაოების მწარმოებელი კომპანიის მიერ მუდმივი მონიტორინგი განხორციელდება. გელათის სამონასტრო კომპლექსის სარეაბილიტაციო სამუშაოები გამორჩეული პროექტია, რომელსაც UNESCO-მა და მისმა მრჩეველმა ორგანიზაციებმა მაღალი შეფასება მისცეს", - ნათქვამია განცხადებაში.
რაც შეეხება მედიაში გავრცელებულ ინფორმაციას, რომ გელათში წყლის ჩასვლის შედეგად ფრესკები დაზიანდა, სააგენტოს ხელმძღვანელი ნიკოლოზ ანთიძე საზოგადოების შეცდომაში შეყვანად აფასებს.
