საკანონმდებლო წინადადებით, ცენტრალურ საარჩევნო კომისიას ცესკოს წევრებისა და მოხელეებისთვის კომპენსაციის დანიშვნა სურს.
მათ მიერ მომზადებული წინადადებით, ცვლილება უნდა შევიდეს „სახელმწიფო კომპენსაციისა და სახელმწიფო აკადემიური სტიპენდიის შესახებ“ კანონში.
პროექტის მიხედვით, ცენტრალური საარჩევნო კომისიის წევრის კომპენსაცია დაენიშნება პირს 65 წლის ასაკის მიღწევისას ან არანაკლებ 25 წლის შრომის საერთო სტაჟის შემთხვევაში, თუ იგი არანაკლებ 6 თვისა იყო საქართველოს ცენტრალური საარჩევნო კომისიის წევრი და მისი უფლებამოსილება ვადამდე არ შეწყვეტილა „საქართველოს საარჩევნო კოდექსი“ საქართველოს ორგანული კანონის 29-ე მუხლის პირველი პუნქტის „ა”-„ვ” ან/და „ი” ქვეპუნქტებით გათვალისწინებული საფუძვლით.
რაც შეეხება კომპენსაციის ოდენობას, წინადადებაში აღნიშნულია, რომ ცესკოს წევრის კომპენსაციის ოდენობა მოქმედი საქართველოს ცენტრალური საარჩევნო კომისიის წევრის ხელფასის მესამედი უნდა იყოს.
რაც შეეხება ცესკოს აპარატის მოხელეთა სახელმწიფო კომპენსაციის გაანგარიშებას, საკანონმდებლო წინადადებით აპარატის მოხელეს კომპენსაცია დაენიშნება 65 წლის ასაკის მიღწევისას, ან თუ აქვს არანაკლებ 25 წლის შრომის საერთო სტაჟი, მათ შორის, საქართველოს ცენტრალური საარჩევნო კომისიის აპარატში მუშაობის არანაკლებ 8 წლის სტაჟი.
საარჩევნო ადმინისტრაციის მოხელის კომპენსაციის ოდენობაა იმავე თანამდებობაზე მყოფი მოხელის მიმდინარე საშუალო ხელფასის მესამედი უნდა იყოს.
სახელმწიფო კომპენსაციისა და სახელმწიფო აკადემიური სტიპენდიის შესახებ კანონის მიხედვით, კომპენსაცია არის პირის ყოველთვიური ფულადი უზრუნველყოფა ამ კანონით დადგენილი წესითა და ოდენობით.
