„ნაციონალური მოძრაობის" ვაკის მაჟორიტარობის კანდიდატის კოტე იოსელიანის ინფორმაციით, მისი დაკავება ძალადობის ფონზე მოხდა. როგორც კოტე იოსელიანმა სასამართლო დარბაზიდან გამოსვლის შემდეგ განაცხადა, მას დაახლოებით 15 ადამიანი დაესხა თავს და მანქანაში ძალის გამოყენებით ჩასვა.

„მე იქ კანონი არ დამირღვევია, არავისთვის მუშაობაში ხელი არ შემიშლია. ბიძინა ივანიშვილის პირადი პოლიცია იდგა და ასრულებდა უკანონო ბრძანებას, კერძოდ, ხელი შეუშალა მოქმედ დეპუტატებს საკრებულოს შენობაში შესვლაში. სახალხო დამცველის წარმომადგენელი 3 საათის განმავლობაში მეძებდა. ორჯერ შეცვალეს ჩემი დაკავების ოქმი. პირველად ჩაწერეს სრული იდიოტიზმი, რომ მე არ დავემორჩილე პოლიციის მოთხოვნას გავყოლოდი მანქანასთან, რასაც საერთოდ არ ჰქონია ადგილი. შემდეგ კი ჩაწერეს თითქოს მე პოლიციას ვაგინებდი, რაც ასევე აბსურდია, რადგან ყველას შეუძლია ნახოს, რომ გინება საპირისპირო მხრიდან იყო", - განაცხადა კოტე იოსელიანმა. 

გუშინ აქციაზე დაკავებული „ნაციონალური მოძრაობის“ წევრების სასამართლო პროცესი 17 ოქტომბრამდე გადაიდო. როგორც  „ნაციონალური მოძრაობის“ წევრები აცხადებენ, მათი დაკავება უკანონოდ მოხდა და პოლიციამ ძალას გადაამეტა.

შსს საკრებულოს მიმდებარე ტერიტორიაზე განვითარებულ მოვლენებზე განმარტებას ავრცელებს