თბილისის მუნიციპალიტეტის მთავრობის სხდომაზე დღეს კახა კალაძემ ქალაქში დაგეგმილ ცვლილებებზე ისაუბრა.
კახა კალაძის თქმით, ქალაქის მთავრობის ერთ-ერთი მთავარი პრიორიტეტია ქალაქის საცობებისგან განტვირთავა, გამონაბოლქვის შემცირება, საზოგადოებრივ ტრანსპორტსა და ფეხით მოსიარულეებზე ორიენტირებული სატრანსპორტო სისტემის შექმნა.
როგორც თბილისის მერმა აღნიშნა, იგეგმება მეტროს რეაბილიტაციის პროექტის განხორციელება, იმისათვის, რომ გადაადგილების დრო შემცირდეს და მგზავრთა რაოდენობა გაიზარდოს. ასევე ავტობუსების პარკის განახლება და მათვის სპეციალური ზოლების შექმნა.
მერმა ასევე აღნიშნა, რომ თბილისში, როგორც ყველა დიდ ქალაქში, აკრძალულია ტრანზიტული მოძრაობა, მაგრამ ხშირად ამ წესს არღვევენ მცირე ჯარიმის გამო, ამიტომ ჯარიმა 500 ლარამადე გაიზრდება.
კიდევ ერთი სიახლე, რომელზეც კახა კალაძემ ისაუბრა ტაქსებს ეხება. მისი თქმით, მერია მუშაობს სამართლებრივი საფუძვლების შექმნაზე, რათა მუნიციპალიტეტმა გასცეს ტაქსის სერვისის განხორციელების ნებართვა.
„თბილისის მოსახლეობა და დედაქალაქის სტუმრები იმსახურებენ ხარისხიან, უსაფრთხო და კომფორტულ სერვისს, ამიტომ ჩვენ ხელს შევუწყობთ ამ სერვისის ეტაპობრივად გაუმჯობესებას. ამჟამად ვმუშაობთ სამართლებრივი საფუძვლების შექმნაზე, რათა მუნიციპალიტეტმა გასცეს ტაქსის სერვისის განხორციელების ნებართვა. ეს იქნება სავალდებულო რეგისტრაცია, რათა ეტაპობრივად განხორციელდეს ტაქსის სერვისის განვითარება იმგვარად, რომ მძიმე ტვირთად არ დააწვება ამ საქმიანობით დაკავებულ მოქალაქეებს. ჩამოთვლილი ღონისძიებები იმ კომპლექსური პროგრამის მხოლოდ ნაწილია, რომლის განხორციელებასაც ვგეგმავთ სატრანსპორტო სისტემის მიმართულებით. ჩვენ მაქსიმუმს ვაკეთებთ ეფექტიანი სატრანსპორტო სისტემის დამკვიდრებისათვის. თბილისი იქნება ჯანსაღი, საცობებისგან თავისუფალი და სიცოცხლით სავსე ქალაქი“, – განაცხადა კალაძემ ქალაქის მთავრობის სხდომაზე.
