უახლოეს მომავალში, საქართველოს პრეზიდენტის ადმინისტრაციისა და სასჯელაღსრულებისა და პრობაციის სამინისტროს ერთობლივი სამუშაო ჯგუფი შეიქმნება,- ამის შესახებ პრეზიდენტის ადმინისტრაციის უფროსმა, გიორგი აბაშიშვილმა განაცხადა.

ცოტა ხნის წინ გიორგი მარგველაშვილი და შეწყალების კომისიის წევრები სასჯელაღსრულების მინისტრს შეხვდნენ და შეწყალების მექანიზმის დახვეწის საჭიროებაზე იმსჯელეს.

გიორგი აბაშიშვილის ინფორმაციით, სასჯელარსრულების მინისტრს შეწყალების პროცესის გაუმჯობესებასთან დაკავშირებით საინტერესო ხედვა აქვს, შეწყალების კომისიის შემადგენლობაში ჩართული იყოს სასჯელაღსრულების სამინისტროს მაღალი რანგის წარმომადგენელი.

„ეს სამუშაო პროცესი მაქსიმალურად უზრუნველყოფს ყველა ტიპის ხარვეზის აღმოფხვრას, რომელიც მოახდენს პრევენციას იმ სამწუხარო ფაქტების, რომელიც შესაძლოა იყოს. ცალკეულ შემთხვევებში შესაძლოა, იყოს გასაუბრებები მსჯავრდებულთან, მინისტრს ჰქონდა ეს პოზიცია“,- განაცხადა გიორგი აბაშიშვილმა.

13 აპრილს ბარნოვის ქუჩაზე 25 წლის გოგოს მკვლელობაში ბრალდებული ვეფხია ბაქრაძე ოჯახური ძალადობისთვის ადრეც იყო ნასამართლევი. მას ვადაზე ადრე გათავისუფლების ადგილობრივმა საბჭომ  გათავისუფლებაზე უარი ექვსჯერ უთხრა. მოგვიანებით ის პრეზიდენტმა შეიწყალა და სასჯელი გაუნახევრდა.