პარტია „თავისუფალი დემოკრატების“ ახალგაზრდულმა ორგანიზაციამ დღეს საზოგადოებრივი მაუწყებლის კიბეებთან აქცია გამართა. ორგანიზაციის პროტესტი საზოგადოებრივი მაუწყებლის ეთერში, გადაცემა „42-ე პარალელში“ გასულ სიუჟეტს ეხებოდა. ისინი მიიჩნევენ, რომ გადაცემაში ჟღერდება პრორუსული აქცენტები და რუსეთისთვის სასარგებლო პროპაგანდისტული ნარატივი.
„თავისუფალი დემოკრატების “ ახალგაზრდული ორგანიზაციის ხელმძღვანელი გიორგი ქიტიაშვილი „ლიბერალთან“ ამბობს, რომ გადაცემა ობიექტურად არ აშუქებს მოვლენებს.
„მაგალითად, „ბრექსიტის“ შესახებ სიუჟეტი ასე მთავრდებოდა: აი, საქართველოს უნდა ისეთ კავშირში შესვლა, რომელიც მალე უნდა დაიშალოს?. რა თქმა უნდა, მათი უფლებაა, რას იტყვიან, მაგრამ ეს არხი ჩვენი ფულით ფინანსდება. ისედაც რუსული პროპაგანდა რეალური საფრთხეა. ამას მთელი მსოფლიო აღიარებს. იმის ნაცვლად რომ ამას ვებრძოლოთ, პირიქით აკეთებენ," - ამბობს გიორგი ქიტიაშვილი.
მისივე თქმით, აქციის შემდეგ შეხვდნენ გადაცემის ავტორს გიორგი გვიმრაძეს. როგორც ქიტიაშვილი ამბობს, ეს გვიმრაძის სურვილი არ ყოფილა, თავად დაწერეს განცხადება და შეხვედრა მოითხოვეს.
„თუმცა მას თავისი არგუმენტები ჰქონდა, ჩვენ - ჩვენი და აზრების მიმოცვლა გამოვიდა მხოლოდ" - ამბობს გიორგი ქიტიაშვილი.
პარტიის ახალგაზრდულ ორგანიზაციაში ამბობენ, რომ ამ საკითხის „მიჩქმალვა“ არ შეიძლება, რადგან შეფარული პროპაგანდა ბევრად უფრო საშიშია და ეს გადაცემა სწორედ ამას აკეთებს. ისინი მიიჩნევენ, რომ ამ პროცესში უფრო მეტი ახალგაზრდა უნდა ჩაერთოს და გააპროტესტოს ამგვარი საფრთხეები.
