თბილისის მერის, კახა კალაძის განცხადებით, ლიცენზიის მქონე ტაქსის მძღოლები ავტომობილების თეთრად შესაღებად უფასო ვაუჩერს მიიღებენ.
მფლობელს, რომლის ტაქსი დარეგისტრირებული იქნება 10 ოქტომბრის ჩათვლით, გავლილი ექნება ტექდათვალიერება, იქნება მარცხენასაჭიანი და 4-კარიანი, საჩუქრად გადაეცემა ავტომანქანის ღებვისა და ქიმიური წმენდის ვაუჩერები. აღნიშნულ ვაუჩერებს მძღოლებს გადასცემს მერიის მიერ გამოცხადებულ კონკურსში გამარჯვებული კომპანია, ტაქსზე ორი წლით რეკლამის განთავსების სანაცვლოდ.
ამას გარდა, თეთრი ტაქსებისთვის ქალაქში გამოყოფილი იქნება სპეციალური სადგომი ადგილები, ტაქსისტებს უფასოდ გადაეცემათ ტაქსის მანათობელი მოწყობილობა და მათ შეუძლიათ ტაქსით მომსახურების გარდა, შემოსავალი მიიღონ ავტომანქანაზე რეკლამის განთავსებით.
„მივიღეთ გადაწყვეტილება ავტომობილების შეღებვასთან დაკავშირებით, ლიცენზიის მქონე მძღოლებს გადავცეთ ვაუჩერი, რომ ავტომობილები თეთრად გადაღებონ. მათ ეს არ დაუჯდებათ არც ერთი თეთრი. ეს მნიშვნელოვნად შეამსუბუქებს ტაქსის მძღოლების მდგომარეობას და ხელს შეუწყობს სწრაფ და ეფექტიან რეფორმირებას”, – განაცხადა კახა კალაძემ.
დედაქალაქში 2019 წლის პირველი ოქტომბრიდან თეთრი ფერის ტაქსები იმოძრავებენ. მიმდინარე წლის პირველი ოქტომბრიდან ტაქსების რეგისტრაცია სავალდებულო გახდა.
