მაისში „ვეფხისტყაოსნის“ მიხედვით შექმნილი გრაფიკული რომანი გამოიცემა - ამის შესახებ „ლიბერალს“ პროექტის მთავარმა რედაქტორმა, მიხეილ ციხელაშვილმა განუცხადა. 

200 გვერდზე მეტი მოცულობის გრაფიკულ რომანს „ბაკურ სულაკაურის გამომცემლობა“ გამოსცემს. ნახატები რომანისთვის მხატვარმა დავით მაჭავარიანმა ხელით შეასრულა. ის ამ პროექტზე 3 წელზე მეტ ხანს მუშაობდა. 

ადაპტირებული ტექსტის ავტორი სალომე ბენიძეა. ტექსტზეც სალომე ბენიძე მუშაობდა მიხეილ ციხელაშვილსა და ნათია ნაფეტვარიძესთან ერთად. მხატვრულ მხარეზე კი დათო მაჭავარიანის სახელოსნო იყო ჩართული.

„მნიშვნელოვანია ის თხრობა, რომელიც ამ გამოცემაში გვაქვს. ტექსტი მართალია გათანამედროვებულია, მაგრამ შენარჩუნებულია აფორიზმები. ასევე არაერთგან არის გამოყენებული ის აღწერითი თუ დიალოგებში გამოყენებული ორიგინალი სტრიქონები, რომლებიც დღესაც მარტივად გასაგებია ქართულენოვანი მკითხველისთვის. რაც შეეხება სიუჟეტს, პოემის იდეურ მხარეს და ა.შ. არანაირი ცვლილებები არ შეგვიტანია. მთელი ოსტატობაც სწორედ ეს არის, რომ გრაფიკული რომანის მედიუმში, მინიმალისტური თხრობით გადმოგვეცა რუსთაველის პოემა.“, - აცხადებს მიხეილ ციხელაშვილი. 

ილუსტრაციები © დავით მაჭავარიანი

შენიშვნა: მასალაში ილუსტრაციის სახით გამოყენებული არ არის საბოლოო საბეჭდი ფაილები.