გაბრიელ გარსია მარკესის ცნობილი რომანი „მარტოობის ასი წელიწადი“ შესაძლოა სატელევიზიო სერიალად გადაიღონ. მარკესის ოჯახისგან ამისი უფლება Netflix-მა შეიძინა. 1967 წელს გამოცემული რომანისთვის ეს პირველი სატელევიზიო ადაპტაცია იქნება. თუმცა, ამის მიზეზი რომანისადმი ინტერესის ნაკლებობა არ ყოფილა.

გაბრიელ გარსია მარკესის შვილის როდრიგო გარსიას თქმით, რომელიც მის ძმასთან გონსალოსთან ერთად ფილმის აღმასრულებელი პროდიუსერი იქნება, მამამისი წლების განამვლობაში უარით ისტუმრებდა შემოთავაზებებს. ამის მიზეზი კი ის იყო, რომ მწერალი მხატვრული ფილმის ქრონომეტრაჟს არასაკმარისად მიიჩნევდა რომანის ეკრანიზაციისთვის.

„ათეულობით წლების განმავლობაში მამაჩვენი რომანის ეკრანიზაციისთვის უფლებას არ ყიდდა, რადგან მიაჩნდა, რომ მხატვრული ფილმის ქრონომეტრაჟში მისი ჩატევა შეუძლებელი იყო. თანაც, რომანი აუცილებლად ესპანურ ენაზე უნდა გადაეღოთ“, - თქვა მწერლის შვილმა როდრიგო გარსიამ.

„მარტოობის ას წელიწადს“ Netflix-ის განცხადებით კოლუმბიაში გადაიღებენ. სატელევიზიო სერიალი ესპანურ ენაზე იქნება. ფრანცისკო რამოსის თქმით, რომელიც კომპანიაში ესპანურენოვანი ფილმების გადაღებას ხელმძღვანელობს, ის Narcos-სა და Roma-ს წარმატების შემდეგ დარწმუნდა, რომ ესპანურენოვან ფილმებს შეუძლიათ პოპულარულები გახდნენ.