ანსამბლ „სუხიშვილების“ დირექტორის, ნინო სუხიშვილის თქმით, მისთვის პატივია 17 მაისს „ოჯახის სიწმინდის დღის“ აღსანიშნავად გამართულ კონცერტში მონაწილეობა. „მე ვარ მართლმადიდებელი ქრისტიანი და თამამად ვაცხადებ, რომ ვდგავარ იქ, სადაც ჩემი ეკლესია დგას“, - თქვა ტელეკომპანია „ერთსულოვნების“ ეთერში ნინო სუხიშვილმა.

ნინო სუხიშვილის თქმით, ის აგრესიისა და ძალადობის წინააღმდეგია, მაგრამ არ ესმის, რატომ აღიქმება 17 მაისს, „ოჯახის სიწმინდის დღეს“ გამართულ ღონისძიებებში მონაწილეობა ძალადობის მხარდაჭერად. ეკლესიის მიმართ ეს დამოკიდებულება კი ალბათ „რაღაც ინციდენტების გამოა“.

„სამების სავანე ჩვენი თვითმყოფადობის, სულიერების და კულტურული მემკვიდრეობის აღორძინების ადგილია. ამიტომ იქ გამართული კონცერტი ჩემთვის არანაირი ძალადობა არ არის და არანაირი აგრესია არავის მიმართ.

ჩემთვის ეკლესია არის სიკეთე და სიყვარული და არ მესმის რატომ მოიაზრება ეს აგრესიად. რასაკვირველია, რაღაც ინციდენტების გამო არის ეს დამოკიდებულება ეკლესიის მიმართ, მაგრამ ცუდი და კარგი, კეთილი და ბოროტი ყველგან არის ერშიც და ბერშიც“, - თქვა „ერთსულოვნების“ ერთ-ერთ გადაცემაში ნინო სუხიშვილმა.

17 მაისი ჰომოფობიასა და ტრანსფობიასთან ბრძოლის საერთაშორისო დღეა. 2013 წლის 17 მაისს თბილისში მოქალაქეთა ნაწილმა, მათ შორის, მართლამდიდებელი ეკლესიის სასულიერო პირებმა ამ დღის აღსანიშნავად გამართული მშვიდობიანი აქცია დაარბიეს.

2014 წელს კი პატრიარქმა ილია მეორემ 17 მაისი „ოჯახის სიწმინდის დღედ“ გამოაცხადა და მას შემდეგ მრეველის ნაწილი 17 მაისს თბილისში მსვლელობას და სხვადასხვა სახის ღონისძიებას მართავს.