„თიბისი ბანკის“ დამფუძნებლები მამუკა ხაზარაძე და ბადრი ჯაფარიძე გენერალურ პროკურატურაში მივიდნენ. მამუკა ხაზარაძის შეფასებით მათ წინააღმდეგ დაწყებული კამპანია ანაკლიის პროექტის შესაჩერებლად არის მიმართული, თუმცა როგორც იგი აცხადებს, არ აპირებს შეჩერებას, რადგან ეს პროექტი ჩვენი ქვეყნის ევროპული ორიენტაციის ნიშანად მიაჩნია.
„სახელმწიფო მანქანა არ აჩერებს თავის მოძრაობას ჩვენს წინააღმდეგ, რომელიც წელიწადზე მეტია გრძელდება. პირდაპირ შემიძლია გითხრათ, რომ ეს ყველაფერი არის მიმართული ანაკლიის პროექტის გასაჩერებლად. ანალოგიური შემოტევა იყო იანვარში. ჩვენ ამან მოგვაყენა ძალიან სერიოზული ზიანი, როგორც ბანკის აქციონერებს, ისე ანაკლიის პროექტის განხორციელებას. გუშინ ავირჩიეთ სამშენებლო კომპანია, საეჭვოდ დაემთხვა ერთ-ერთი მინისტრის განცხადება, რომ პროგრესი არაა. დღეს ვიგებთ პროკურატურის განცხადებას ისევ ტელევიზიით, რომ ზიანი მიაყენონ ანაკლიის პროექტს. თუ ვინმეს ჰგონია, რომ ანაკლიის პროექტი, ხაზარაძის პროექტია, ძალიან ცდება. ესაა ჩვენი შვილების, მომავალი თაობის პროექტი, ესაა აბსოლუტურად ახალი გზა, გარღვევა, ევროპისკენ გადადგმული მძლავრი ნაბიჯი“, - განაცხადა ხაზარაძემ.
როგორც „თიბისის“ დამფუძნებელმა პროკურატურის შენობაში შესვლამდე განაცხადა, არ გამორიცხავს დაკავებას, თუმცა ამით არ შეშინდება: „არასდროს არაფერს არ გამოვრიცხავ, მით უმეტეს იმ ქაოსში, რომელიც ქვეყანაშია სამწუხაროდ. რომელიც არ არის ორიენტირებული მშენებლობაზე, რომელიც არ არის ორიენტირებული ხვალინდელ დღეზე და ორიენტირებულია ერთმანეთის ჩაძირვაზე, ჭორაობაზე და მსგავს რაღაცებზეა აწყობილი პოლიტიკა, ამიტომ არაფერს არ გამოვრიცხავ. მზად ვარ ყველაფრისთვის და ვერავინ ვერავის შეაშინებს. ამ ქალაქში გავიზარდე და ძალიან ბევრი რამე მინახავს, რომ ასეთი შოუებისთვის გულის ფანცქალი დაგვეწყოს. გუშინ ჩამოვედი, მინდა გითხრათ, რომ ერთი ქართველი დაიბადა, ჩემი შვილიშვილი, ალექსანდრე. უცხოეთში ვიყავი. გახარებული ჩამოვედი და ეს სიურპრიზი დამხვდა“.
ხაზარაძემ მის წინააღმდეგ აღძრული საქმის დეტალებზეც გააკეთა კომენტარი და მას აბსურდი უწოდა: "გამოძიებას ჩვენ ამ ტრანზაქციაზე მივაწოდეთ სრული ინფორმაცია. თქვენ იცით, რომ რამოდენიმე იურიდიულმა და აუდიტორულმა ორგანიზაციამ ჩაატარა მისი გამოკვლევა. ის, რაც დღეს გააჟღერეს, არის აბსოლუტური აბსურდი და ძალიან მრცხვენია, რომ ასეთი პროკურატურისა და შინაგან საქმეთა სამინისტროს ხელში ვართ,“
მთავარმა პროკურატურამ მამუკა ხაზარაძეს და ბადრი ჯაფარიძეს ბრალი წარუდგინა. დღეს მთავარ პროკურატურაში გამართულ ბრიფინგზე განაცხადეს, რომ "თიბისი ბანკის" დამფუძნებლებს ბრალი ედებათ ჯგუფურად ჩადენილი უკანონო შემოსავლის ლეგალიზაციის ფაქტზე.
