წარმოშობით ქართველი რეჟისორის ლევან აკინის „და ჩვენ ვიცეკვეთ" შვედეთის სახელით ოსკარზე გაიგზავნება. ქართულ-შვედური კოპროდუქცია, ამერიკის კინოაკადემიის დაჯილდოების 92-ე ცერემონიალზე, უცხოენოვანი ფილმის კატეგორიაში იქნება წარდგენილი.
ფილმის მსოფლიო პრემიერა, რომელიც ქართველი გეი წყვილის ურთიერთობას ეხება, კანის კინოფესტივალზე 16 მაისს გაიმართა. როგორც სინოფსისში წერია, „ქართულის მოცეკვავე მერაბის ცხოვრება რადიკალურად შეიცვლება მას შემდეგ, რაც მის ცხოვრებაში ქარიზმატული და უდარდელი ირაკლი გამოჩნდება. ირაკლი მერაბის ყველაზე ძლიერ მეტოქედ და ამასთანავე მოწონების ობიექტად იქცევა, კონსერვატიულ გარემოში კი მას ბევრი რისკზე წასვლა მოუწევს“.
