საქართველოში მოდა ერთგვარ მსუბუქ და უმნიშვნელო თემად აღიქმება, მოდით დაინტერესებულები კი - არასერიოზულ და ზედაპირულ ადამიანებად. ნორვეგიელი ჟურნალისტის და მკვლევრის, მარი გრინდე არნტცენის საოცრად საინტერესო წიგნი „Dress Code: The Naked Truth About Fashion“, სრულად გაგათავისუფლებთ მსგავსი სნობური განცდისაგან. არნტცენის ნაამბობი ცხადად დაგანახებთ, რომ სწორედ მოდა და მოდის ინდუსტრიაა ის ადგილი, სადაც თავს იყრის ბოლო ათწლეულების ყველა ყველაზე აქტუალური საზოგადოებრივი და კულტურული ტენდენცია.
მოდა, როგორც სხვებისაგან გამორჩევის, ასევე სხვებთან დამსგავსების ხელოვნება; როგორც ერთ-ერთი ყველაზე დამუშავებული და სრულყოფილი სისტემა და იმავდროულად, მძლავრი, მოცულობით მეხუთე ინდუსტრია მსოფლიოში, რომელიც აერთიანებს მოდის ცნობილ სახლებს, „მას-მარკეტის“ ტანსაცმლის მწარმოებლებს, სტილისტების, მომხმარებლებისა და მოდის მიმომხილველთა მთელ არმიას; მოდა, როგორც ეკოლოგიური პრობლემების წყარო და როგორც ჩვენი ირაციონალური, თითქმის ფიზიოლოგიური ლტოლვის შედეგი სილამაზისადმი...
ერთი სიტყვით, ავტორი მოდას განიხილავს ყველა შესაძლო რაკურსიდან - ეკონომიკურიდან ეთიკურამდე და მის შესახებ წერს ისეთი მომნუსხველობით (ადგილებში აფორიზმული სიგესლითაც კი) რომ შეუძლებელია საკითხავს მოწყდე და რაც მთავარია, დაგრჩეს ოდნავი ეჭვი მაინც, რომ მოდა - არასერიოზულია.
ფრაგმენტი: „ისტორიულად, თავსაბურავიანი (კაპიუშონი) ზედატანი, აფროამერიკელების ქუჩის სუბკულტურის ნაწილია. იმავდროულად, კულტურის ისტორიაში დამკვიდრდა ტრადიცია, რომ ავისმომასწავებელ, საშიშ სახეებს სწორედ ასეთი თავსაბურავებით გამოსახავდნენ. მაგალითად, სიკვდილს ხშირად ხატავენ გრძელ თავსაბურიან ლაბადებში... ჰარი პოტერის შესახებ წიგნებშიც სასტიკი დემენტორები თავსაბურავიანი მოსასხამებით ჩნდებიან. თეთრი კაპიუშონი - კუ-კლუს-კლანის სიმბოლოა. (...) თუმცა, კაპიუშონი ყოველთვის არ არის ბოროტების ატრიბუტი. ის თითქოს სპეციალურად შეიქმნა მოზარდებისათვის, რომლებიც ცხოვრების რთულ ეტაპს გადიან. და თავსაბურავი აქ ერთდროულად ორ ფუნქციას ასრულებს: ერთი მხრივ, ის გამოარჩევს მათ ობივატელური გარემოდან და მეორე მხრივ, აერთიანებს მათ ერთ საერთო ჯგუფში, რომელთანაც თავს აიგივებენ. თავსაბურავი მათ თითქოს იცავს. სწორედ ასე ხდება, რომ ისეთი წვრილმანი, როგორიც თავსაბურავია, გადაიქცევა ხოლმე დიადი იდეების მატარებლად“.
ნორვეგიულის გარდა, წიგნი ხელმისაწვდომია ინგლისურ და რუსულ ენებზე:
Mari Grinde Arntzen „Dress Code: The Naked Truth About Fashion“
Мари Гринде Арнтцен „Дресс-код: Голая правда о моде“
