ოჯახში ძალადობის მსხვერპლის დასაცავად კანონი რამდენიმე მექანიზმს ითვალისწინებს. ერთ-ერთი ასეთი შემაკავებელი ორდერია. მას პოლიციის თანამშრომელი გასცემს, შემდეგ კი, 24-საათის ვადაში, სასამართლო ამტკიცებს ან დამტკიცებაზე უარს ამბობს. ორდერი 1 თვემდე ვადით გაიცემა.
დამცავი ორდერი მსხვერპლის მოძალადისგან განრიდებისა და თავშესაფარში მოთავსების საკითხს არეგულირებს. ის მოძალადეს ავალდებულებს, რომ მსხვერპლი აუცილებელი ნივთებით და ქონებით სარგებლობისგან არ შეზღუდოს. ორდერი მოძალადისა და ბავშვის ურთიერთობის საკითხსაც აწესრიგებს. მოძალადეს მსხვერპლის სამსახურთან და იმ ადგილებთან მიახლოება ეკრძალება, სადაც მსხვერპლი იმყოფება. შემაკავებელის მსგავსად, დამცავი ორდერი შეზღუდვებს იარაღის ფლობასა და შეძენისასაც ითვალისწინებს.
